大隻佬麵重生　改咗靚名更傳神

屹立旺角半世紀雲吞麵舖「大隻佬」龍記麵家揸弗人、人稱龍哥的賴達芳為了愛情，讓老妻安享晚年坐郵輪享福，去年7月毅然結業，傷透一眾「麵粉」的心；大半年後，盡得龍哥真傳、人稱阿細的十弟義芳，為了親情，承傳大哥心血，在同一條街開設雲吞麵舖，索性名為大隻佬麵店，「大哥花咗一生心血經營麵店，無償傾盤教授，思前想後，我決定將大哥手藝傳落去，目標開連鎖麵店，將龍記發揚光大」。
記者：蔡朗清

位於旺角黑布街104號的龍記麵家，早已改為小食店，昨天對面97號舖，卻掛上大隻佬麵店招牌，並印有谷起老鼠仔的大隻佬卡通人物。站在門口迎客的人，正是龍記老闆賴達芳的十弟賴義芳（阿細）。阿細稱，昨天是麵店試業，讓夥計熟習運作，下月3日正式營業。自龍記去年7月結業，不但熟客不捨，「跟着大哥做麵店幾十年，梗係唔捨得。大哥叫我接手，嗰陣心大心細，未有決定，選擇休息一陣」。
阿細稱，身邊不斷有人游說他合作開麵店，「與其同人合作，我不如自己開，諗到咁，積極搵舖，機緣巧合，搵到同一條街開店，呢度係龍記條根，好多街坊支持」。他強調，自細是壞仔一名，「成日沙沙滾，夜夜笙歌，好感激大哥畀機會我，帶我入行，重新做人。但我唔想做壞大哥幾十年招牌，新店唔叫龍記，索性叫大隻佬麵店，搵埋三哥幫手，都係兄弟班」。

走新派路線吸年輕客
新店裝潢光潔，走新派路線，與傳統龍記不同，希望吸納多些年輕客群，「夥計數目比以前多一倍，我想將麵店以連鎖式經營，將大哥心血發揚光大」。
他強調，經營手法創新，菜式及做法則保持龍記傳統，「保留晒龍記招牌菜，好似獨門自創嘅辣牛筋麵、豉油炸醬撈河粉、雲吞麵等」。此外，為了適應新一代，又加入豬肉丸、魚皮餃等麵。因租金食材價格飆升，不得不加價，碗麵由過去24元加至28元，撈麵由30元加至34元，「真係冇辦法，啲租比龍記嗰陣貴好多」。
龍哥昨天也前來視察一番，他稱，當初最放心不下是最細的弟弟，當年帶他入行，現在見他決心繼續龍記心血，十分放心，「我開心佢有咁嘅魄力，佢同我做法雖然唔同，新派啲，但我對佢好有信心，可以將龍記發揚光大」。龍哥稱，龍記結業後，終於能兌現向妻子承諾，帶龍嫂去遊埠，「4月同佢坐郵輪去台灣」。


[img]http://static.apple.nextmedia.com/images/apple-photos/apple/20140227/large/27lp6p2.jpg[/img]
■老闆阿細（右）繼承大哥手藝經營大隻佬麵店，更找來三哥（左）幫手。黃耀興攝


來源:蘋果日報網站